السلام عليكم ورحمة الله وبركاته.

تخيل العالم يوم واحد بدون إنترنت!!!!

شلل عام في كل نواحي الحياة، طب متيجي نرجع شوية لورة ونشوف يعني ايه إنترنت أصلًا وازاي بدأ ووصل للشكل الجبار اللي عليه حاليًا.

مبدئيا كدة علشان تقدر تتواصل مع شخص أخر سواء من خلال رسالة وتس أب أو إيميل فلازم يكون الإنترنت واصل في الجهازين(المرسل، والمستقبل)

طب إيه هو #الإنترنت أصلًا وازاي بيشتغل ويوصل مليارات البشر ببعضهم؟

كلمة إنترنت معناها نقل بيانات في بين جهاز وأخر أو بين عدة أجهزة عموما والأجهزة اللي متوصلة ببعض دي بنسميها شبكة، وده علم كامل اسمه علم الشبكات، يبقى كدة الإنترنت عبارة عن بيانات بيتم نقلها من جهاز لأخر.

طيب متى بدأ الإنترنت؟

في عام 1957 أطلقت الولايات المتحدة الأمريكية وكالة ARPA ودي وكالة أبحاث مشاريع علمية وهي تابعة لوزارة الدفاع الأمريكية، وكان الغرض من هذا البحث هو تطوير التقنيات العسكرية، يعني كان الغرض عسكري فقط.

وفي عام 1569 بدأت ARPA في البذرة الأولى وعملت شبكة إنترنت تسمى بــ ARPANET ودي يا صديقي كانت أول شبكة تربط بين 4 أجهزة خاصين بالباحثين علشان يقدروا يتبادلوا المعلومات بينهم، ودي كانت الشرارة الأولى للإنترنت.

بعد 13 عام وفي سنة 1982 تم اعتماد بروتوكول يسمى TCP والـ IP ودولا لينا معاهم قعدة لكن سريعًا كدة تقدر تقول عليهم مجموعة من القوانين اللي بتساعد في نقل البيانات بين جهاز وأخر بدون أي مشاكل ولا فقد للمعلومات.

ولحد هنا كان الإنترنت خاص بالمنظمة العسكرية فقط مفيش أي مدني يقدر يتعامل معاه.